1. Aallaqqaasiut

Saqqummersitami matumani innuttaasut isertitaasa qaffasissusaat, isertitaqarnerup ilusaa aamma suut isertitsissutaasinnaanersut ersersinneqarput. Saqqummersitami uani 2015-imiit 2019-imut isertitat takuneqarsinnaapput, kisitsisit pineqartut kisitsisaataasivimmi 2002-miit aallartittut pissarsiarineqarsinnaapput.

 

Isertitat assigiinngisitaarnerini The European Union Statistics on Income and Living Conditions (EU-SILC)-imi maleruagassat malillugit suliarineqarput. SILC kisitsisitigut paasissutissiornermi assigiissaarinermik suleqatigiiffiuvoq EU-p ataani. SILC-mit OECD-mi piumasaaqaatit angusimavai. SILC aqqutigalugu nunanik allanik sanilliussisinnaaneq annertooq anguneqarpoq. Tassunga tunngatillugu saqqummersitami Periaaseq pillugu immikkoortoq 7.4 kapitali 7-imiittoq atuarneqarsinnaavoq.

 

Saqqummersitaq kapitalinik arfineq marlunnik immikkoortortaqarpoq, kapitalit tamaasa immikkoortillugit atuarsinnaavatit. Kapitali 2-mi taaguutit isertitanut tunngasut pingaaruteqarnerpaat atuarneqarsinnaapput.

Inuit isertitaanut tunngasut kapitali 3-mi sammineqarput. Kapitalip aallaqqaataani 2019-imi inuit isertitarisimasaanut tunngasut nutaat saqqummiunneqarput. Tamatumalu kingorna piffissami 2015-imiit 2019-imut inuit isertitaasa ineriartorsimaneri immikkut sammineqarlutik. Ukiut tallimat ingerlanerini najugaqarfiit inuttullu inissisimaneq apeqqutaatillugit inuit isertitaat erseqqissarneqarput.

 

Kapitali 4-mi ilaqutariit isertitaat saqqummiunneqarput, kapitalimilu 5-imi takuneqarsinnaallutik isertitanit akileraarutit katinnerat. Kapitali 6-imi takuneqarsinnaapput isertitat assigiinngisitaarneri pingaarnerit. Kapitali 6-imi takutinneqarlutik isertitat assigiinngisitaarneri pillugit nunanut tamalaanut sanilliussinerit, kapitali 6-illu naggataani immikkut sammineqarput ilaqutariit meerartallit isertitaasa ineriartornerat.

 

Saqqummersitaq naggaserlugu kapitali 7-imi immikkut sammineqarput paasissutissat tunngaviusut (datagrundlag), maleruagassat, periutsit aamma taaguutit ilanngullugit nassuiaassisoqarluni.

 

Kalaallit Nunaanni isertitat 2002-miit 2019-imut imartuut kisitsisaataasivimmi pissarsiarineqarsinnaapput: http://bank.stat.gl. Kisitsisaataasivimmi nammineq toqqartuillutit aallersinnaavutit, ass.: ukioqqortussutsit, suiaassutsit, najugaqarfiit, inunngorfiit aamma ilinniagarisimasat tunngavigalugit.

 

Saqqummersitani iluarsaassineq

Saqqummersitami uani saqqummersitat siulii eqqarsaatigalugit iluarsaassisoqarpoq, kisitsisit kisitsisaataasivimmiittut saqqummersitap siulianit iluarsaassineq pissutaalluni allanngorput. Iluarsaassinerit ukiunut ukununnga tunngassuteqarput 2002 – 2019. Iluarsakkat ukuullutik:

·         Pisortaqarfinnit isertitanik nuussinermi akileraarutitaqanngitsut annertusinerat.

·         Ilaqutariit isertitaat, siullermik inoqutigiit isertitaat pineqartaraluarput.

·         Sulisitsisut aaqqissugaat Kalaallit Nunaata avataanut utoqqalinersianut katersanut akiliutit akileraarutitallit 2018-imiit akileraarutaasussanut ilanngupput, kisianni isertitanut taaguutinut atorneqartunut allanut ilanngillat.

·         Isertitat atoriaannaat tassaapput ernianut akiliutit, isertitanut akileraarutit aamma akilersuutit peereerlugit isertitat.

Iluarsaassinermut paasissutissat sukumiinerusut kapitali 7-imi immikkoortoq 7.3-imi allaaserisaq atuarneqarsinnaavoq.